حلم كسر قلبى

لما دخلت الجامعه كان اكبر احلامى هو انى اعيش احلى وقت فى عمرى و انى اعيش حياة الجامعه الى انا كتير سمعت عنها و شوفتها فى الافلام

و لما عشت اول يوم ليا فى الجامعه كانت بداية معرفتى للحقيقه و هى ان حياة الجامعه الى انا حلمت بيها ما هى الا وهم كبيرخصوصا ان انا كنت فى كليه عمليه و وقتى كله محاضرات و سكاشن و صدقونى من اول يوم

المهم عدت الايام و ابتدا حلمى الى كنت نسيته يكبر لما قابلت زميلى الى اصبح بعد كده حبيبى و كان احسن بنىآدم فى الدنيا فى عينى وهو فعلا كان كويس اوى وده كان بشهاده من كل الى حولينا حتى اهلى لانه جه البيت و اتعرف عليهم على اساس ان احنا نتخطب بعد هو ما يتخرج
و قد كان واتخرج حبيبى و كان المفروض ان احنا نتخطب و لكن حصل الى انا ما كنتش اتوقعه وهو ان احنا سبنا بعض بس مش هى دى المشكله المشكله الحقيقيه احنا ليه سبنا بعض
احنا سبنا بعض لان والده مقتنع ان مش فى حاجه اسمها حب وان انا بحبه لانى طمعانه فيه رغم ان انا من عيله مرتاحه ماديا والحمد لله وعندى عربيتى الخاصه يعنى باختصار مش محتاجه حاجه منه و لكن هو رايه غير كده وهو كمان شايف ان عمر الحب ما يبنى بيت رغم ان هو و هو شاب كان بيحب زميلته و كان عاوز يتجوزها و لكن اهله مش رديوا و اتجوز جواز صالونات عادى و شايف انها مش فارقه كتير و للاسف بأه ان ابنه الى هو كان حبيبى مش قدر يدافع عن نفسه و عن حبنا ادام كلا والده الى للاسف هو شبه اقتنع بيه
و خلص حلم الجامعه المزعوم بجرح فى قلبى وفى كرامتى و كبريائى
القصه دى عمرها 3 سنين و بعدها طبعا قابلت ناس كتير بس دى حكايه تانيه هبأه احكيهالكوا